مشاهدة النسخة كاملة : شليويح العطاوي
فالح بن دهمه
17 - 04 - 2009, 15:51
هذا بيتين لشاعر العظيم
شليويح العطاوي العتيبي
ولكن لا نملك بقية القصيده .. للاسف
ومن يعرف بقيتها نرجوا تزويدنا بها .. للاهميه
تحياااااااتي للجميع
ياسايق الفنجال عده لمدوخ = وثنه لبن صلال والا الجلاوي
وانا زبون الجرد ابو ضيف الله = لاقصر الشارب اعن الشفاوي
سالم العظيمان
18 - 04 - 2009, 18:11
اررحب يا ابو محسن
ونعم بالشاعر والفارس المشهور شليويح العطاوي
وهذي قصيدته في معركة طلال الشهيره
اول كلامي طلبتي ذكر الله=ماني عن الرب الكريم غناوي
اغفر ذنوبي يا محل ذنوبي=ان كان في بدع كلامي غاوي
مانيب من يمدح بقوله لسانه=ولا ني على عشق البني هواوي
على طلال الصبح خيل مخيلة=تاصل سناويها الى المطاوي
وبروقها الهند ومصاقيل العجم=ورعودها البارود والعزاوي
وتمطر بعطشان المحبب والقنا=والها بروس الخيرين تعاوي
جانا بن سعود مسير بجنوده=معه الدويش ولمة البداوي
ومعه جموع سبيع واهل العارض=وصبيان ورقا وبيرق القصماوي
هم ثمانية الاف عداد جموعهم=بلوى وربي يدفع البلاوي
وحنا ثمانمائة عداد جموعنا=ماش اجنبي فينا ولا برقاوي
الاد روق اللي عريب جدهم=لاجا من الحكام رد براوي
ندّب علينا شيخنا ابن محمد=ثم انتهض مثل العقاب الناوي
عودٍ تعطف في ظهر جلومز=جلومزٍ مثل القضيب الهاوي
مترفعٍ عنها اللحم بعلوها=شعلاً شعاع شعلّةٍ شعلاوي
وصحنا عليهم ثم عاونا الله=لين انها صارت لنا مناوي
ياظفرهم لاقرب الله دارهم=وحنا عليهم مثل نجمٍ هاوي
لكن سربتهم اليا اوجهنا بهم=زمولٍ مخزمة على الكراوي
وطلحه نحوا عنا ببريه يسارهم=وتاقبوا دهم العروق هداوي
كن الجنايز في نحاوي طلحه=جدع الخشب فالوادي السناوي
وحنا تلاقينا بسربة علوى=وساع الطعون مطوعين الغاوي
ونخيت مزحم سعد منهم ربعه=يوم اللقا زادوا ورا الهقاوي
ردوا يمانيهم لكل مجرب=ياما خذوا من روح كل مساوي
نضرب بسلات الهنادى روسهم=ونقصم مثانيهم مهيب سطاوي
ونرخي عيهم حد كل موصلة=في فعلها يحتار كل مداوي
وارويت مذلوق القنا من خيلهم=لين ادبحوا شرابة القهاوي
ومنعت سلطان البعير بينهم=والشيوخ ما صدوا لها نحاوي
يارب تنجي وتنجي سابقي=اللي تزبني عن الاهاوي
ما يلحق العنان هامة راسها=ياكود يركيها على السنداوي
مضرب يديها في صليب الرقه=تاخذ من ادنى الحزم كبر الشاوي
قبٍ من الزلبات وافٍ عدها=بنت الاصيل وركضها فجحاوي
ابرها وام العيال تبرها=تشرب حليب الفاطر الجنفاوي
تطلعن يالبيض في مركاضنا=وصلت كسايرهم الى الحجناوي
وعزي لهم لولا اسمر في خيلهم=هوي علينا اهواية النداوي
لا رحم ابو من صد عن محرافها=يوم انخلاع الستر عن مضاوي
نطعن لعين اللي تهل دموعها=تبكي وفي تالي البكا نخاوي
تقول ياالظفران من عاداتكم=هوشوا عسى يبقي لنا شلاوي
ونطعن لعين اللي تجر حنينها=عفرا تبا صيفية المطاوي
قلت ابشري بالفك ياحم الذرا=دام الطعن يفك والاهاوي
تزبنوا عنا قصور عنيزة=لين احتماهم بيرق القصماوي
ترعى بنا عوج الركاب وتنثني=ماحدرت حسلة الى الحجناوي
والمدح لله ثم نسل محصن=عسى لهم عند الاله عراوي
اهل العطف واهل المقام شيوخنا=واهل الكرم والمنزل المتساوي
سواقة المغتر على الحرابه=يوم الحريب عن الحريب يلاوي
يا سايق الفنجال عده لمدوخ=واثنه لابن صلال والجلاوي
وانا زبون الحرد ابو ضيف الله=لا قصر البرطم عن الشفاوي
وانا احمد الله يوم انا من لابه=ماهم بقطمان اليدين شواوي
فالح بن دهمه
18 - 04 - 2009, 19:22
يااااااااااسلام عليك
بيض الله وجهك يالذيب
صح لسانك والله
شليويح شاعر عملاااااااااق جدا
تحياااااااااااااااتي
سالم العظيمان
20 - 04 - 2009, 01:38
ووجهك ابيض يا ابو محسن
والعفــو طال عمرك